ސޯމާލިއާގެ އައިއެސްގެ ގަވަރުނަރު ހަނގުރާމައިގެ މައިދާނުން ފިލައިގެން ގޮއްސި

ސޯމާލިއާގައި ހުންނަ އިސްލާމިކް ސްޓޭޓް (އައިއެސް)ގެ ސަރަހައްދީ ލީޑަރު އަބްދުލް ޤާދިރު މުމީން ހަނގުރާމައިގެ މައިދާނުން ފިލާފައިވާކަން ޕުންޓްލޭންޑްގެ ކަމާބެހޭ ފަރާތްތަކުން ވަނީ ކަށަވަރުކޮށްދީފައެވެ.

މިހާރު ހިނގަމުންދާ ހިލާކް އޮޕަރޭޝަންގެ ތަރުޖަމާނު ޖެނެރަލް މުހައްމަދު އަހުމަދު ފާދިގޯ ހޯމަ ދުވަހު (26 ޖައުޒާ) ލޯކަލް މީޑިއާތަކަށް މައުލޫމާތު ދެއްވި ގޮތުގައި ޖާސޫސީ ރިޕޯޓްތަކުން ދައްކާ ގޮތުގައި މުމީން ފިލާފައިވަނީ ފަރުބަދަމަތީ ސަރަހައްދު ކަމަށްވާ ކަލްމިސްކާޑުންނެވެ.  ނަމަވެސް އޭނާ ފިލައިގެން ދިޔަ ވަގުތާއި ވަކި ހާލަތަކާ ގުޅޭ އިތުރު ތަފްސީލެއް ހާމަކޮށްފައެއް ނުވެ އެވެ.

ފާއިތުވި މަސްތަކުގައި ޕަންޓްލެންޑްގެ އޮޓޮނޮމިކް އެޑްމިނިސްޓްރޭޝަނުން ދަނީ ސޯމާލިއާގައި އައިއެސްގެ ޙާޟިރީ ރޫޅާލުމުގެ މަގުސަދުގައި ހިލާކް އޮޕަރޭޝަންގެ ނަމުގައި ބޮޑު އަސްކަރީ ހަމަލާއެއް ހިންގަމުންނެވެ.  އޮފިޝަލުން ރިޕޯޓްކުރާ ގޮތުގައި މި ކެމްޕޭނުން ވަނީ ގްރޫޕްގެ ވަރުގަދަ ތަންތަން ބަލިކަށިކޮށް ބޮޑެތި ކާމިޔާބީތަކެއް ހޯދާފައެވެ.

ހުކުރު ދުވަހު ޕަންޓްލެންޑްގެ ރައީސް ވަނީ މި އޮޕަރޭޝަންގެ ތިންވަނަ މަރުހަލާ ނިންމާފައިވާކަން އިއުލާން ކުރައްވައި، ކަލްމިސްކާޑް ފަރުބަދަމަތީ ސަރަހައްދުގެ ގާތްގަނޑަކަށް %98 އައިއެސް ހަނގުރާމަވެރިންގެ ކިބައިން ސާފުކޮށްފައިވާ ކަމަށް ވިދާޅުވެފައެވެ.  އޭނާ އިތުރަށް ފާހަގަކުރެއްވި ގޮތުގައި ހަތަރު ވަނަ މަރުހަލާގައި އަމާޒުކުރާނީ ކަލްމިސްކާޑާއި ވަށައިގެންވާ ސަރަހައްދުތަކުން ފިލައިގެން އައިއެސްގެ ބާކީ ތިބި ހަނގުރާމަވެރިން ހިމާޔަތް ހޯދާފައިވާ ސަރަހައްދުތަކަށެވެ.