ލިޔުންތެރިޔާ: މުހާޖިރު ޞާފީ
ލޮބުވެތި ކިޔުންތެރިން، ސަރަހައްދީ އަދި ބޭރުގެ ސިޔާސީ ޖަމާއަތްތަކުން ދާޢިޝް (އައިއެސް) ފަދަ ހަރުކަށި އަދި ޓެރަރިސްޓް ޖަމާއަތްތައް އުފެއްދުމާ ގުޅޭ މަޝްވަރާތަކާއި، މި ޖަމާއަތްތަކަކީ އިސްލާމީ އުނގަންނައިދިނުންތަކާ ހަގީގަތުގައި ގުޅިފައިވާ ޖަމާއަތްތަކެއް ނޫން ކަމަށް ބުނާ މަޝްވަރާތަކާ ދިމާވިކަން ޔަގީނެވެ. އެހެންނަމަވެސް، އަޅުގަނޑުމެން ބޭނުންވަނީ، މިކަމާ ގުޅޭގޮތުން އިތުރު ސާފުކުރުމެކެވެ.
ފުރަތަމަ ކަމަކަށް ފާހަގަކޮށްލަންޖެހޭ ކަމަކީ، ދީނަކަށް ނިސްބަތްކުރެވޭ ކޮންމެ ޢަޤީދާއެއް ނުވަތަ ފިކުރެއް ބިނާވެފައި އޮންނަންވާނީ، އެ ދީނެއްގެ އަސާސީ މަޞްދަރުތަކާއި، އެ ދީނަށް ތަބާވާ މީހުންގެ ލިޔެކިޔުންތައް ލިޔެފައިވާ ބަޔާންތަކުގެ މައްޗަށެވެ. ވަކި ޢަމަލެއް ދީނުގެ އުޞޫލުތަކުން ކުށްވެރިކޮށް މީހުން އެކަމަށް ޢަމަލުކުރަން ފަށައިފިނަމަ އެއީ ޤަބޫލުކުރެވޭ ކަމެއް ނޫންކަމަށާއި އެ ދީނަށް ފާޑުކިޔުމުގެ ސަބަބެއްގެ ގޮތުގައި ބޭނުން ނުކުރެވޭނެއެވެ.
އެހެންކަމުން ދާޢިޝްގެ ސަފުތަކުގެ ތެރެއިން ޤަބޫލުކުރެވޭ އަދި އިތުބާރުކުރެވޭ ޢިލްމުވެރިން ނެތުމަކީ އިސްލާމްދީނުގެ ނުވަތަ މުސްލިމުންގެ މަންދޫބެއްގެ ގޮތުގައި ނުބެލެވޭނެއެވެ. އެމީހުންގެ ނުބައި އަމަލުތަކަކީ އިސްލާމްދީނުގެ މުޤައްދަސްކަމާމެދު ސުވާލު އުފެއްދުމުގެ ޙައްޤަކަށް ވެގެން ނުވާނެއެވެ.
އިސްލާމްދީނުގެ ނިވާކޮށްގެން އަނިޔާވެރިކަމާއި ޖަރީމާތައް ހިންގާ ދާޢިޝްއާއި އެހެނިހެން ހަރުކަށި ޖަމާއަތްތަކަކީ، ޙަޤީޤަތުގައި، ހަޤީޤީ މުސްލިމް މުޖުތަމަޢާ މާ ދުރު ބައެކެވެ. އެމީހުންގެ ފިކުރުތަކާއި ސުލޫކުތައް އިސްލާމީ އުނގަންނައިދިނުންތަކާ އެއްގޮތެއް ނުވެއެވެ.
ދާޢިޝްގެ އަސްލާ ގުޅޭ ސިއްރު އަދި މުހިންމު މަޢުލޫމާތުން ސާފުކޮށް އެނގޭ ގޮތުގައި އެ ޖަމާޢަތަކީ އިސްލާމްދީނުގެ ނަމުގައި ވަކި ސިޔާސީ މަޤްޞަދުތަކެއްގެ ދަށުން އުފެދި، ތާއީދު ކުރި ޖަމާޢަތެކެވެ. ލިޔުންތެރިޔާ އަދި ސިޔާސީ ތަހުލީލުކުރާ ޖޭ.ސީ ވަރލެމަން އޭނާގެ އެއް ލިޔުމެއްގައި އަލިއަޅުވާލާފައިވަނީ ޖަރުމަނުގެ ނޫހަކުން ދާއިޝް އަކީ އިސްލާމީ ޖަމާއަތެއް ކަމަށް ބުނާ ޚިޔާލު އަނެއްކާވެސް ދޮގުވާ ލިޔެކިޔުންތަކެއް ޝާއިއުކޮށްފައިވާ ކަމަށެވެ.
މި ލިޔެކިޔުންތަކުން ހާމަވާ ގޮތުގައި ދާޢިޝް އުފެއްދުމާއި ހަރަކާތްތައް ހިންގުމަށް ހުށަހެޅި ޕްލޭނަކީ ދީނީ ޖަމާޢަތެއް އުފެއްދުމާ ދުރު ޕްލޭނެކެވެ.
މީގެ އިތުރުން އެމެރިކާގެ ނޭޝަނަލް ސެކިއުރިޓީ އެޖެންސީގެ ކުރީގެ އެޑްވައިޒަރ އެޑްވާޑް ސްނޯޑަން މީގެ ކުރިން އެއްބަސްވެފައިވަނީ ދާޢިޝްގެ ލީޑަރު އަބޫބަކުރު އަލް ބަޣްދާދީގެ ކުރިއެރުމަކީ އެމެރިކާއާއި އިނގިރޭސިވިލާތާއި އިސްރާއީލުގެ ޖާސޫސީ އެއްބާރުލުމުގެ ނަތީޖާ ކަމަށެވެ.
އިސްލާމްދީނުގެ ދުޝްމަނުން އަބަދުވެސް މަސައްކަތް ކުރަމުން އައީ މާތްވެގެންވާ އިސްލާމްދީން ދާޢިޝްގެ އަމަލުތަކާ ގުޅުވައިލުމަށެވެ. އެހެންނަމަވެސް، ދާޢިޝްގެ ސުލޫކު ހުރިހާ މުސްލިމުންގެ ސުލޫކާ ވަރަށް ތަފާތު ކަމަށާއި، މި ޖަމާޢަތަކީ “ދީނީ ހިދާޔަތުގެ ރަމްޒެއް” ކަމުގައި ނުބެލެވޭނެކަން ޔަގީނެވެ.
