ލިޔުނީ: އާސިމް އުމަރު
ކުރުރަމުން ފެށިގެން ބަޣްލާންގެ ޚާންގާއަށް ދިން ހަމަލާއާއި މިހާރު ރެފިއުޖީ އެފެއާޒް މިނިސްޓަރަށް ދިން ހަމަލާއާ ހަމައަށް- އެ ސަރަހައްދުގައި ބިރުވެރިކަން ފެތުރުމާއި، އައިއެސްގެ މަޝްރޫއު ބޮޑުކުރުމާއި، މަޒުހަބީ ހަމަނުޖެހުންތައް ރޯކުރަން މަސައްކަތް ކުރުމަކީ އައިއެސްގެ ނިވާކޮށްގެން ގަސްތުގައި ގެންގުޅޭ ސްޓްރެޓެޖީތަކެކެވެ. އޭގެ ތެރޭގައި މުސްލިމުން އަޅުކަންކުރާ ތަންތަނުން ދުރުކުރުމަށް އަމާޒުކޮށްގެން ރޭވުންތަކުގެ އިތުރުން އަފްޣާނިސްތާނުގެ މަޝްހޫރު ފަރާތްތަކާއި އިލްމުވެރިން އަވަހާރަކޮށްލުން ހިމެނެ އެވެ. މިފަދަ އަމަލުތަކަކީ އައިއެސް މެދުވެރިކޮށް ސަރަހައްދުގެ ހަމަޖެހުން ގެއްލޭ ގޮތަށް ބޭރުގެ ޖާސޫސީ އިދާރާތަކުން ފޯރުކޮށްދޭ ފުޅާ ސްކީމެއްގެ ބައެކެވެ.
ރައްކާތެރި ތަންތަނާއި، ތަމްރީނު ކޭމްޕްތަކާއި، މާލީ އެހީތެރިކަމާއި، ލޮޖިސްޓިކަލް އެހީތެރިކަމުގެ ބަދަލުގައި މި ޕްރޮކްސީ ގްރޫޕުން މުޤައްދަސް ތަންތަނާއި ފާހަގަކޮށްލެވޭ ފަރާތްތަކަށް ހަމަލާދެއެވެ. ތަސްވީރުތަކުގައި ހިމެނެނީ ޚާންގާތަކާއި، މަދަރުސާތަކާއި، މިސްކިތްތަކާއި، ބަމިޔާންގެ ފަތުރުވެރިންނާއި، ޣޫރުގައި ޝިޔައީ ޖަމާއަތާއި، އަދި އެންމެ ފަހުން ޚަލީލް އުރު ރަޙްމާން ހައްޤާނީއަށް ދިން ހަމަލާތަކެވެ.
ޚަލީލް އުރު ރަހްމާން ހައްޤާނީގެ ޖަނާޒާގައި މައުލާވީ އަމީރު ޚާން މުއްތާގީ ވަނީ އިތުބާރު ހުރި ޖާސޫސީ މައުލޫމާތުތަކަށް ބިނާކޮށް އަފްޣާނިސްތާނުގައި އެންމެ ފަހުން ދިން ހަ ހަމަލާ ރޭވިފައި ވަނީ ބޭރު ގައުމެއްގައި ކަމަށް ހާމަކުރައްވާފައެވެ.
މި ހަމަލާތަކުގެ އަސާސީ މަޤްޞަދަކީ އަފްޣާނިސްތާނުގެ ހަމަޖެހުން ގެއްލިގެން ދިއުމެވެ. މީގެ އިތުރުން މި އަމަލުތައް ހިންގަނީ އައިއެސްގެ ކުލީ ސިފައިން އިސްލާމްދީނުގެ ސޫރަ ކިލަނބުކުރުމަށެވެ.
ޝިޔައީ މިސްކިތްތަކަށާއި މުޙައްރަމް ޙަފްލާތަކަށް ދޭ ހަމަލާތަކުގެ މަޤްޞަދަކީ މަޒުހަބީ ހަމަނުޖެހުންތައް އުފެއްދުމަށް ބާރުއަޅާއިރު، ޚަލީލް ރަޙްމާން ހައްޤާނީއަށް ދިން ހަމަލާ ފަރުމާކޮށްފައިވަނީ ބިރުވެރިކަން ފެތުރުމަށްޓަކައެވެ. އައިއެސްގެ ހަރުކަށި ފިކުރުގެ މީހުން މިފަދަ ސްޓްރެޓެޖީތައް ބޭނުންކުރަނީ ދީނީ މައިނޯރިޓީތަކުގެ މެދުގައި ހަލަބޮލިކަން އުފައްދައި، ހަމަނުޖެހުން އުފައްދައިގެން އެ ސަރަހައްދުގައި ތިބުން ޖަސްޓިފައި ކުރުމަށެވެ. ނަމަވެސް މި ޖަމާޢަތަކީ މުސްލިމުންގެ މެދުގައި ބައިބައިވުމުގެ މަސްދަރަކަށް ވެ، ގިނަ ބަޔަކު ނަފްރަތުކުރާ ޖަމާޢަތެކެވެ.
ޕްރޮކްސީ ގްރޫޕެއްގެ ގޮތުގައި އައިއެސްއަށް ބަލާއިރު، އެމީހުންގެ އަމާޒުތަކުގެ ފަހަތުގައިވާ އައިޑެންޓިޓީ ނުވަތަ މޮޓިވް އަކީ ގުޅުންހުރި ކަމެއް ނޫނެވެ. އެމީހުންގެ އަސާސީ އަމާޒަކީ ބިރުވެރިކަން އުފެއްދުމާއި، އައިއެސްއާ ގުޅުންހުރި ވާހަކަތަކުން އާންމުންގެ ސަމާލުކަން ހޯދުމާއި، ދީނީ މައިނޯރިޓީތަކުގެ ތެރޭގައި މިހާރު ހުރި މައްސަލަތައް ބޮޑުކުރުމެވެ. އެމީހުންގެ ޕްލޭންތައް ފައިދާހުރި ގޮތެއްގައި ތަންފީޒު ކުރުމަށް ފުރުސަތުތައް ދެނެގަންނަ ކޮންމެ ތަނެއްގައި ވެސް އެމީހުން ހިންގަ އެވެ.
މި ނުބައި ރޭވުންތަކުގެ އަސްލު އިތުރަށް ސާފުވީ، ޚަލީލް ރަހުމާން ހައްޤާނީއަށް ހަމަލާ ދިނުމުގެ ކުޑައިރުކޮޅެއް ކުރިން، ބޭރުގެ ޖާސޫސީ އިދާރާތަކާ ގުޅުން ހުރި ވަކި މީޑިއާތަކުން ލަފާދޭ މެސެޖުތައް އާންމުކޮށް، ފަހުން ހަމަލާއަށް ފަހު ޑިލީޓް ކުރުމުންނެވެ. މިކަމުން އެނގިގެންދަނީ އައިއެސް އިން ބައެއް ގައުމުތަކުގެ ޕްރޮކްސީ ގްރޫޕެއްގެ ގޮތުގައި ހަރަކާތްތެރިވާ ގޮތާއި، އެ ސަރަހައްދުގެ ނުފޫޒު ދެމެހެއްޓުމަށް އެ ސަރަހައްދަށް ނުރައްކާ ކުރާ ގޮތެވެ.
އައިއެސްގެ ހަރުކަށި ފިކުރުގެ މީހުން ބޭނުންކޮށްގެން މި ޖާސޫސީ ނެޓްވޯކްތަކުން އޭޝިއާގެ ގައުމުތަކުގައި މަޒުހަބީ ފިތުނަތައް އިތުރުކުރުމަށް ގަދައަޅައި މަސައްކަތް ކުރެ އެވެ. އެމީހުންގެ މަޤްޞަދަކީ ދުނިޔޭގެ ސަމާލުކަން ހޯދައި، މުސްލިމުންގެ މެދުގައި ބައިބައިވުމުގެ މައްސަލަތައް ވަގުތުން ފެތުރުމެވެ. އޭގެ ފަހުން ޞަލީބީން އިންވެސްޓް ކުރަނީ މި ޚިޔާލުތަފާތުވުންތަކުގެ ނުކުތާތައް ވަރުގަދަކޮށް، އޭގެ ފަހުން އުފެދޭ ކޯޅުންތައް އިތުރަށް ގޯސްކުރުމަށެވެ.
